Hikayat Sri Musim (Lhee sikarang saboh semesta)

Hikayat Sri Musim (Lhee sikarang saboh semesta)
Ciptaan: Fuadi Kelayu Assalamu’alaikum rakan meutuwah Jaroe dua blah tanda mulia Ta lakèe meu'ah ka nibak Allah Desya yang luwah beu ampôn sigra

Sigala Pujoe puwoe keu Allah Yang maha pemurah lagi maha kaya Yang po kuasa dônya wal akhirah Yang bi berkah keu mandum hamba Seulaweut saleum keu Nabi Muhammad Beu sabé ingat di dalam dada Uroë dudoë nanggroë akhirat Beurempek syafaat bak padang masya Allahu Allah Tuhan lon sidroe Yang peu jeut asoe langet ngon donya Yang peujeut laot di bineh darat Yang peu meu sapat glee ngon rimba Yang peujeut tanoh ngat jeut ta meu blang Tanyoe peutimang pade ta pula Sideh dalam glee ta pula Lawang Na penghasilan wase lam rimba Meunan keuh udep geutanyoe insan Tiep uroe Tuhan nafkah ta mita Kiban keuh cara na penghasilan Nyo laot, glee ngon blang Konle lam reugam tanyoe bersama

Mukim Lampuuk masa saboh jan Na lhèe boh bagian musém geujaga Sa Musém la'ôt, dua musém blang Bak keulhee rakan glée meusamporna Situs sejarah na peninggalan Kurok-kurok Jepang mariam momong na Makam putroë salamah inong Sölutan Masa saboh jan meukawen ngon raja Jaya di la'ôt makmu dalam blang Glee yang manyang tuhan karonya Ureung geumaséh ngon handai taulan Udép lam teunang hana dawa dawa Makmu dalam glé jai timoh lawang Yum masanyan meugok-gok dônya Bak drien meutuwah meuboh seb simban Macam varian na lam glé raya

Jampok, jalo, kunyet, aneuk meuh Golom get deuh, bee ka meu bura Dari Lhok Mamplam timoh dum saree Sampoe meusampe Ujong glée Raja Dari Lam Narah trok u Lange Trôn u alue piye, lawang ngon drien meuriti banja Di Alue raya ngon guha kalé Ureung jak u glé lam bahagia Oeh habeh musem meu glee Hana wate pree bak geu oseuha Laju grak langkah u bineh laot Wate angen pot musem barat teuka Geu peu “Toh La Oh” (Tsoh Laot) ngen urot Jineu Laot geu pageu ngen bleut tuha Eungkot kareung keunan meulangue ’Oh ka jai meupreu pasoe lam raga Ban ka Punoh raga ngen eungkot Laju geu angkot Puwo le sigra Hate that seunang bahgia jigrop-grop Geuwoë le patôt u rumoh tangga Ban trok urumoh laju geusambôt Nyan teuma ungkot jôk keu ma idara Ladom peu aweuh, ladom peu masén Oeh santeng santeng keuneubah kana Yang tabeu asoe ungkot le geuplah Nyan cara kubah seugolom kulkah na Oeh lheuh geupeugléh boh sira bagah Uroe pih that crah adee lé sigra Eungkot masen Seubagoe bekalan Dak jampang-jampang beukai kalheuh na Hana lé meh moh watè musém blang Seubab persediaan kalheuh geukira Musem tron u blang nyan pih karab troh Mak-mak bit sunggoh dalam blang raya Jak mita latsap sipot jeut pajôh Pasoe lam bungkôh tima tuha Di latsap nyan pih jai beureutôh Si'at ka trôh punoh tima Puwoe jak taguen ngen sawi la'ôt Leumak be jipot tijoh ie babah uluwa Teuma musem tron u blang jino katroh Keu peunajoh na eungkot masen barosa Han apoh apah raseuki bak alam Geujôk lé Tuhan keu mandum hamba Leuh nibak nyan musem tren u laot Jak kawe eungkot na macam cara Trôh musém barat dak keubang keu bot Kawé geu sangkot bak geulayang tuha Kawee anggak layang oen sukôn Jiphe meu lambong u angkasa Geulayang peu pho ji'ék ngon jitrön Meulambong-lambong ateuh laot raya Meuseunoh eungkot choh mata kawe Ubéna parte jitubiet lam kareung raya Ditaluem umpeun cahya meuble-ble Cara cok wasee luar biasa Bak musém Timu la'én piasan Lhoh noh oeh malam binèh kuala Diteungoh punyie oeh tenang keadaan Boh dum ditran ureung luem kana Taguen sira keu buët harian Bumbu masakan keu peunyum rasa Peu lom meutamah ta picet asam Campli ngen bawang keu peu troh hawa Hudép meusaneut hana sikakhan-sikhan Harmoni alam ngon manusia Meunan falsafah lam kehidupan Lhe sikarang lam saboh semesta Hikayat nyoe ét noe keunarang Bak beuleun Sya'ban teungöh purnama Dua ribè dua limong lahe nyoe kalam Ngat trang pikiran keu suwa bantsa.